Kevaka me da masulaka ka lolovaka na noda sasaga e na rawa ni yaco me vaka kina na tatadra e na dua na siga.
Oqo na veika e vakaraitaka ko Jiutatia Cakacaka, e dua vei ira na lewe 52 na itabagone era taurivola mai na Youth Training Center e Valelevu, Nasinu ena siga Tusiti ni macawa oqo.
E yabaki 21 ko Jiutatia ka cavutu mai na koro o Natila, Bau, Tailevu, ka sa mai vakacavara vinaka na nona vuli yabaki dua ena tabana ni vakatagi (Certificate IV in Music).
Na vuli yabaki dua oqo e veivuke kina na Minisitiri ni Qito kei na Tabagone ka sega ni saumi na kena curucuru.
E ciqoma tiko na nona sitivikiti ko Jiutatia Cakacaka mai vua na Minisita ni Tabagone kei na Qito ko Jese Saukuru ena siga Tusiti ni macawa oqo
E vuli voli mai Vunimono Primary mai na kalasi dua kina walu, ka dewa yani ki Vunimona High ka vakacava na nona fomu vitu e Sacred Heart College ni bera ni dewa yani e na Fiji National University e Tamavua me laki vulica na koroi ni Public Health.
E mai ciqoma na cocovi ni gone gugumatua se vakatokai tiko me ‘Best All Rounder’.
E sega ni namaka ko Jiutatia me na ciqoma na icocovi oqo, ka vakavinavinakataka na Kalou na taledi e so e dau vakarautaka vua.
E tomana na gauna e se lailai kina e dau taleitaka vakalevu na lagasere.
E kaya ni sega ni namaka me na mai vuli e na koronivuli oqo, e lagasere ga e na dua na soqo vei nona momo ka ma ni raici koya kina ko iratou mai na ‘National Youth Band’ ka sureti koya sara me mai vuli kina.
E vakaraitaka ni so na dredre e dau sota kaya e koronivuli ka vaka kina e vale, ia me sa tiko ga vei keda yadua na yalo ni vakarorogo kei na muri lewa me rawa ni taladrodro vinaka kina na sasaga.
Sa nona ituvatuva tiko ko Jiutitia me na tomana tale na vuli oqo e na yabaki mai qo, kevaka sa na tuvatuva ni Kalou me lewena e dua na matabani ni mataivalu e na muria me vaka kina na nona digidigi.
Veivakasalataki tiko ko Jiutitia vei ira na nona icaba kevaka sa tiko na taledi ni lagasere se taledi cava ga me da vakayagataka sara vakavinaka baleta na veika kece oqori e solia mai na Kalou me da taukena ka me da kakua ni vakaweleweletaka ka me da toso tiko ga iliu e na veigauna kece.
Vakaraitaka o Elenoa Koroimara e dua talega vei ira na tauri sitivikiti sai koya me ra kua ni dau vakawelena eso na vuli e solia tiko na matanitu.
E na nona tubu cake tiko mai a sega ni nona tatadra voli tu me na lewena na vuli oqo ka ni dau tatadra volitaka tu ga me lewena na ovisa ni valeniveivesu.
A sega ni rawata vinaka na nona maka ni fomu ono, ka sa ma ni vakatulewataka sara me vaqara cakacaka me rawa ni vukei rau kina na nona tubutubu.
A cakacaka voli ka mani raica na vuli oqo e na mona livaliva ka gagadre sara me lewena.
Mai na matai kina karua ni wasewasea ni vuli, e a vaqara voli tu ga na nona ivodovodo me rawa ni lako vuli, a qai dau veivuke tiko vua o tamana na gauna e tiko kina nai lavo.
E vakaraitaka ni oqo e dua na vuli vinaka ka vakarautaka na Minisitiri ni Tabagone kei na Qito me vakaogai ira kina na gone e ra tu e na noda veikoro vakaviti ka vaka kina e na noda vei taoni me ra vakaitavitaki ira kina, ka ni qo e dua talega na sala ni rawa ka vakacakacaka mai muri.
E tomana ka kaya na vuli talega vaka oqo e rawa ni kauti keda kina dua na vanua vinaka,ka da rawa ni lewena na matabani ni mataivalu, rawa ni tomani tale na vuli qasenivuli ni vakatagi me rawati sara e dua na koroi vinaka e na veigauna mai muri.
Sa nona ituvatuva tiko ko Elenoa me na tomana tale na vuli qo e na yabaki mai qo e na dua tale na kena ivakatagedegede.
Vakatataro: salaseini.guniyaga@fijisun.com